مطار شرم الشيخ الدولى .

مطار شرم الشيخ الدولى .

اول ما تخش المطار تشعر بالغربه من نضافة المكان الى احنا مش متعودين عليها فى بلدنا .

غير وشوش الاجانب المتعددة الجنسيات اشى روس على نرويج على طليان على انجليز وطبعا موظفين مصريين غير السادة حراس الامن والامان . اول ما نخش المطار تبدا النظرات تلاحقنا من كل مكان وكل العيون وكاننى دخلت دوامه عمال الف حوالني نفسى مش لاقى مكان ابص فيه وما فيهوش عين بتبص علينا .تقولش نجوم لا نجوم مين النججوم فى مطار شرم الشيخ مالهمش معنى اتذكر انى قابلت نجوم كتير فى المطار وما حدش بيبص لهم ولا بيجرى عليهم ولا بيعبرهم.ولكن احنا حاجة تانيه مختلفة .الخواجات ينظروا لنا على اساس اننا ناوين نفجر المطار يبداو يتابعونا على اساس ان قبل ما نفكر ندوس على الزرار يكونوا هربوا او اختباوا فى مكان بعيد عنى وزوجتى.

رجال الامن بيداوا عملهم من اول بوابه فى المطار بتشدد على اساس اننا اذكياء لدرجة ان ممكن تكون القنبله موجودة فى صبعى الصغير . فلازم يحتاطوا باكبر قدر ويفتشوا اصغر جزء

مراتى لازم تخش اوضة النساء ومعاها السيدة امينه الشرطة لترى وجهها ولكم السيدة الاكينة بعد ان كشفت وجه زوجتى سالتها انتى مسلمه على اساس انها مش واخده بالها ان مراتى منقبة فمراتى ضحكت وقالت لها شور( اكيد )

قالت لها على كدة بتصلى مراتى قالت لها ييس ( اة ) السيدة امينه الشرطة وحافظة طبعا قرءان مراتى رديت (ييس)

السيدة امينه الشرطة حفظها الله من كل سوء طبعا لحرصها على الاسلام عايزة تتاكد ان مراتى مسلمه بجد ولا بتلعب بالدين عايزة تعرف مراتى مسلمه محافظة ولا لابسه النقاب وخلاص دينها ياناس وبتحبه وخايفة عليه من اللصوص والارهابيين فالسيدة امينة الشرطة طلبت من مراتى انها تسمع اى حاجة من القرءان ( على اساس انه لا يجوز لبس النقاب وانت مش حافظ القرءان ولا يجوز ان تكون مسلم ومش عارف تصلى ولا يجوز لاجنبية ان تكون مسلمه بدون قرءان مراتى فورا قالت لها

بسم الله الرحمن الرحيم

قل هو الله احد الله الصمد لم يلد ولم يولد ولم يكن له كفوا احد.بسم الله الرحمن الرحيم قل اعوذ برب الناس ملك الناس اله الناس من شر الوسواس الخناس الذى يوسوس فى صدور الناس من الجنه والناس صدق الله العظيم

ولله الحمد مراتى نجحت فى اختبار كشف الكذب وتكرمت وسمحت لها السيدة امينه الشرطة بالعبور من اول بوابه

وفى اثناء امتحان القرءان لزوجتى فى غرفة النساء كنت انا مازلت على البوابه الاولى خالع الجزمة والشراب والحزام ومطلع جيوبى برة والناس بتتفرج على انا كان كل همى وانا بخلع الجزمة ان الشراب الى انا لابسه يكون هو الشراب المقطوع وبعدين المطار مليان اجانب وكلهم عمالين يبصوا علينا.وحمدت الله انه مش مقطوع زوجتى خرجت وانا بلبس الشراب ساعدتنى وسندتنى لغايه ما لبست الجزمة. والحمد لله اول بوابه عدينا منها بسلام

انتظرنا فى الكافتريا والنظرات تلاحقنا من كل اتجاة قاعدين بنشرب قهوة واخوكم قاعد حاسس انه عريس فى فرح وكل الى فرح عواجيز الفرح كل واحد وواحدة حاطين بوزهم فى بوز بعض وعنيهم علينا ونازلين كلام كلام كلام

قسما بالله انا نفسى اروح من هنا تعبت من النظرات

المهم حان الوقت للذهاب

توجهنا للبوابه الى قبل الاخيرة

زوجتى ربنا اكرمنا ومرت بسلام

والجهاز جه عندى و فضل يصفر كل ما اجى امر يصفر اقسمت لهم انى خلعت برة الجزمة والحزام والشراب ولو عايزنى اخلعهم تانى اخلعهم مش مهم انا شرابى مش مقطوع الحمد لله ولو مقطوع بردة حخلع الجزمة مش مهم

مرينا بسلام ولله الحمد بدون خلع

وجينا على اخر بوابه واقفين فى الطابور الى بعدية بنركب الاتوبيس للطيارة والدور جه علينا السيد الصول سالنى الباسبورتات من فضلك

كنت ماسكهم فى ايدى وكان الاول باسبور مراتى فاخدة وقلبه يمينا وشمالا وفتح وقفل ويقلب فيه ويرجع للصفحة الاولى وينظر لها بتمعن ومن ثم يرجع تانى للصفحة الاولى وبعد لحظات من تفحصة للباسبور اعطانى الباسبور فى ايدى ونظر لزوجتى وقالى فين باسبور المداميعنى هى كانت صدمة انا نظرت لحضرتة وابتسمت واخفيت ابتسامتى الصفرا واحترت ةمش عارف اقوله اية يا حضرة الصول الى كان فى ايدك دة باسبور مراتى انت بقالك خمس دقايق بتبص فى باسبور مراتى وفى النهاية بتقولى فين باسبور المدام .بصى لى وارتبك وتردد ولم ينظر فى باسبورى مجرد لمسه ورجعه لى تانى وقالى اتفضلوا .

يااااااااااااااااااااة

الحمد لله اخيرا حنخش عالطيارة

ركبنا الاوبيس ونزلنا وصعدنا للطيارة كل واحد فى الطيارة قاعد فى حاله الى بيبص من الشباك والى بيقرا حاجة والى نايم اخوكم بعد ما خلص دعاء السفر قاعد عمال افكر فى الناس دى والنظرات دى حاسس بخوفهم منى

عارفين والله العظيم بفكر اعمل ايه فى اللحظة دى

مع انى عارف انهم قاعدين بيفكروا فى الارهابيين والعمليات الارهابيه وتفجير الطائرات وخطف الطائرات اخوكم عايز يقوم مرة واحدة يصرخ فيهم ويقول BOooooMB (قنبله)

نفسى اتفرج عليهم وهما بيصرخوا ويناموا على الارض ويعيطوا هههههههههههه والله حيكون منظر يستاهل انى اتسجن سنه لزعزعة الامان فى الطائرة وترهيب وترعيب الامنين