تونس فتحت للعرب الباب .. فادخلوا ولا تتردوا .

بعد السلام عليكم ورحمه الله .

مايحدث الان فى الوطن العربى كله على خلفيه احداث تونس . هو ماقبل الغليان . الناس درجه حرارتها مرتفعه ولكنها لم تصل الى مرحله الغليان .كل يوم مواطن عربى يقوم بحرق نفسه .. والناس تتابع الاحداث وبتحرق فى اعصابها ودمها وقلبها بيتوجع على حرق احدهم لنفسهم تعبيرا عن رفضه للوضع فى المنطقه والاوضاع خاصه ببلدة . الناس كفرت بالحاكم العربى والحكومه العربيه الناس كفرت من الذل والهوان والفقر والمرض . فى المقابل حاكم عربى واسرته  وجيرانهم يتمتعون بخيرات الوطن ويديرون ظهورهم للمواطن وواثقين انهم حاكمين البلد بيد من حديد .مافيش مواطن عربى يقدر يفتح بقه بكلمه لا.. او باعتراض الا لقله قليله من المعارضه . لكن الحكومه لا تبالى ايضا لابمعارضه ولا باى معارض . ولولا ماحدث فى تونس لما اهتمت اصلا بمن يحرق نفسه وقسما بالله لو لم يكن هناك ثورة بتونس على خلفيه احداث حرق شاب تونسى لنفسه لكانت حكومتنا العربيه تركت من يحرق نفسه يولع ولو احدهم كب جاز على نفسه لاعطته الحكومه الكبريت .

بجد مش حينفع كدة .  لازم كل الشعوب العربيه تتحرك ضد الطغاة العملاء  الحكام .لازم الشعوب تعبر عن نفسها وعن رفضها .القذافى خرج يقول للتوانسه ليه بتعملوا كدة وعملتوا كدة ليه فى الراجل الكويس بن على ولازم تلعبوا مع بعض ورجعوة تانى  عشان تحرقوا نفسكم واحد ورى التانى .. وماقالش مثلا ليه يابن على تأمر بضرب الناس بالنار وليه قتلت اكتر من عشرين شاب . ليه ياحبيبى كدة تلعب بالنار  هى ماما ماقالتلكش الى يلعب بالنار تلسعه ..القذافى العاقل زعيم الثورة بالعالم كما يزعم تواضعا لكنه يظن انه اله الثورة ولذلك لابد ان يبقى الاله ابدا على كرسى الحكم بيقول لو كان الشعب راح خبط على باب بابا على وقاله ممكن نمسك الحكم بدالك  كان الراجل قالهم اتفضلوا وعزمهم على شاى كمان وطلع لهم خريطه تونس  وشرح لهم خطه اللعب .. طيب ياشعب ليبيا بما ان حاكمكم عاقل وابن حلال كدة ماتتحركوا روحوا له وقولوا له ممكن تريح شويه عايزين نحكم بلدنا بنفسنا شوفوا الراجل حيقولوكم ايه ولو قال لا او قفل الباب فى وشكم نقعدة فى قعدة عرب ونغرمه خروف .

ياعربى فرصتك الان ان تتحرك حاكمك اى ان كان اسمه فهو مرعوب منك .بعد ان كنت  انت المرعوب هو اصبح المرعوب .انزل امشى فى مظاهرة مش حيقدر يمسكك لانه مش حيقدر يديك الكبريت دلوقتى. لو رميت على نفسك جاز  حيرمى نفسه عليك عشان ماتولعش وحيحلفك بامك وابوك وبكل الى بتحبهم ماتولعش ..هو خلاص شاف الدرس بعينه  وخايف .ياعربى قول كلمتك اتكلم بحريه .. ولا انت خلاص ماعندكش  امل تكون حر نسيت معنى الحريه  نسيت الكرامه والنخوة . خوفك  اصبح هو الحاكم .اقتل خوفك ماحدش حيقدر يقرب لك . ماحدش حيقدر يدوس لك على طرف . ماحدش من الامن حيقدر يعتقلك  لان الامن عارف ان لو غلط غلطه حيركب رئيسه الطيارة .خوفهم اصبح ظاهر فى كلامهم وفى خطبهم وفى ردود فعلهم ..الامن فى كل مكان منتشر على النت وبين الناس بيهديهم بيقولهم كلام فارغ .بيقولوا ايه الى حيحصل لو حصل لنا زى تونس الناس مش  حتبطل رشاوى ولا فساد ..يامواطن احنا مش بنتكلم عن فساد ولا رشاوى احنا بنتكلم عن حاكم بيحكمك من اكتر من عقدين وماصص دمك وبيتمتع بذلك وحالف ليموتك من المرض والفقر والجهل ..هو دة الى احنا عايزين نغيرة عايزين نجرب حاكم تانى ولو قدرنا نغير واحد حنغير كل يوم واحد لغايه ما يحكمنا واحد وطنى بجد . احنا ممكن نعملها دلوقتى بس الناس تتجرأ وتقول كلمه حق ..الناس تفتح بقها بس عشان. ترضى ربنا وما تخافش من حاجه لان مافيش حاجه تخوف ..عشان خاطر مستقبلك ومستقبل عيالك عشان خاطر ابوك وامك الى  عاشوا حياتهم فى رعب وذل وجهل واحيانا مش لاقيين تمن العلاج ..دلوقتى وانت شفت بعينك لما الشعب التونسى وقف مع بعض عملوا ايه فى اقل من شهر .. الحكومات العربيه خايفه مرعوبه منك يعنى لو قلت لهم بخخخخخ حيركبوا  الطيارة   على طول ..

قال الرسول الكريم محمد صلى الله عليه وسلم ..من راى منكم منكرا فليغيرة بيدة او بلسانه او بقلبه .وذلك اضعف الايمان ..شارك فى تغير المنكر وجود حاكم بيحكمك بدون اختيارك منكر . حاكم بيسرق قوتك وقوت عيالك منكر .. حاكم بيبيع كنوز وطنك ويسرق الفلوس منكر . حاكم بيتعاون مع عدوك عليك وبينصرة على ابناء جلدتك منكر .. غير المنكر وكن مؤمن  ..

الفرصه فرضت نفسها على المنطقه .. شعب تونس العظيم رفع معنويات العرب وقتل معنويات الحاكم ذل بن على وذل كل الحكام العرب . جعلهم  يظهروا بصورتهم الحقيقيه . جبناء جبناء جبناء ..

ردد ورايا لو كنت مصر ى يسقط يسقط حسنى مبارك ..(قول ماتخافش .) قول بايدك قول بلسانك وسمع العالم قول بقلبك .. عايز ايه  تانى قول فى سرك بس من قلبك المهم تقول

ردد ورايا لو كنت ليبى .. يسقط يسقط القذافى ..ردد ورايا لو كنت يمنى ..يسقط يسقط عبد الله  صالح .

ردد ورايا لو كنت اردنى يسقط يسقط الملك حسين ..ردد ورايا لو كنت سودانى 

يسقط يسقط البشير .

يسقط يسقط بوتفليقه ..يسقط يسقط الملك عبد الله .
ردد ورايا لو كنت عربى .. يسقط يسقط كل عميل يسقط يسقط كل خائن يسقط يسقط كل فاسد يسقط يسقط كل جبان .

الشعب التونسى قدم لكم الجواب على التغير .. فلا تقولوا الجواب غلط ..

الجواب هو بوعزيزى .. ولو اجتمع كل المثقفين  فى العالم العربى على ان الثورات تختلف من بلد لبلد ومش شرط ان تقوم ثورة فى مصر لنفس سبب قيام ثورة فى تونس ..لا هو كدة دة الى حيحصل  والثورة الى قامت فى تونس هى بدايه ثورة فى العالم العربى . بوعزيزى ولع فى نفسه عشان  تعب من الحياة عشان ياس عشان هو مستضعف .. وكذلك يمتد الحريق لكل مستضعف ..الوضع فى تونس زى الوضع فى كل بلد عربى لايختلفتونس هى امتداد لكل الوطن

ظلم وفساد وعماله وسرقه ونهب وجشع وظلم واستبداد وديكتاتوريه . الظروف واحدة فى كل الوطن العربى . والاسباب واحدة والطريقه ستكون واحدة ...لانها ثورة واحدة بلسان واحد والنتيجه واحدة والهدف واحد ..