نوارة نجم- من ميدان التحرير
شيل كفنك واحفر قبرك وانزل التحرير
مسامحينك من قبل ما تعتذر... الخناقة مش معاك.. احنا عارفين طريقنا كويس، وعارفين عدونا كويس، وعشان كده كنا بنطلب منك تسمع كلامنا... كله خير ان شاء الله
---------
مبارك بيتناصح علينا؟
ما عاش ولا كان اللي يفتكر نفسه بيضحك علينا... ده احنا المصريين، نودي اتخن تخين البحر ونرجعة عطشان، احنا طيبين اه، عبط لا، ومش عشان كل اللي حواليه اغبيا افتكر نفسه نبيه
ها؟ اخر حلقات الثورة المضادة ان تحصل مواجهة بين الجيش والشعب؟ ها؟ ده اخر ما جادت عليك بيه المنوفية يا مبارك؟ طب احنا عندنا منايفة انبه منك كتير، ده انت عريت المنايفة
احنا شايلين اكفانا وحافرين قبورنا
وآدي رسالة للجيش المصري باسم الشعب المصري،
وايوة باتكلم باسم الشعب لاول مرة في حياتي، وانا ضامنة برقبتي، باسم الخمسة وتمانين مليون بني ادم:
مش حنرفع ايدنا على الجيش المصري، ولا حيطلع من بقنا له غير كل خير، وكل بر، وكل طيبة... واذا احنا هُنّا عليه وقرر يموتنا، احنا بنوعده اننا رافعين ايدينا لفوق، ايادي عزل، وحننام له كمان تحت الدبابة عشان ما نتعبوش في الجري
لئن بسطت يدك إلي لتقتلني ما أنا بباسط يدي إليك لأقتلك... ولا أزقك، ولا حتى أمنعك إنك تقتلني
مش احنا... مش احنا ابدا، ومافيش حد، مهما يعمل، حيعرف يلتف على ثورتنا، واللي احنا عايزينه هو اللي حيحصل، احنا اصحاب الثورة، واحنا اصحاب التضحية، واحنا اصحاب الفلاح... واللي عايزينه هو اللي حيحصل إن شاء الله
يا ريتك بقى يا مبارك تلم تعابينك عشان ما تتعبش قلبك.. سنك ما يستحملش
احنا قلبنا ما بيتعبش، ما عادش خلاص، قلبنا تعب لحد ما نحس، وبعد ما شفنا الجيش بيضربنا مش باقيين على الدنيا دي
اللي عايز يموتنا يموتنا... ويبقى كسب فينا جميلة، واحنا مش حنمنعه يقتلنا، ولا حنمد ايدنا بالسوء، ولا حنلطخ صوابعنا بالشر
مبارك كان دايما يقول للامريكان: انتوا اصلكم ما تعرفوش الشعب المصري
وانت يا مبارك ما تعرفش الشعب المصري
مصر ام الخير... واحنا الخير
والخير له الكلمة الاخيرة
المجلس الأعلى للقوات المسحلة يوجه رسالة اعتذار لشباب الثورة عن ما فعلته الشرطة العسكرية ليلة أمس ويتعهد بعدم تكرار هذا الأمر مرة ثانية *** شهود عيان: عربات للأمن المركزي تظهر لأول مرة أمام مجلس الشعب والمتحف المصري منذ اندلاع ثورة 25 يناير ، ونشاط مكثف لعربات الشرطة المصرية صباح السبت بشارع رمسيس وميدان التحرير ** الشرطة العسكرية وقوات من الجيش تفض اعتصام المئات من المطالبين بإسقاط حكومة شفيق بميدان التحرير باستخدام القوة المفرطة ،، الجيش ضرب المحتجين بالعصي الكهربية والهروات خلال فض الاعتصام ،، الجيش أطفأ الأنوار بميدان التحرير قبل مهاجمة المعتصمين
ليست هناك تعليقات:
إرسال تعليق