انا ضابط شرطة واتطهرت خلاص .

اكتر من عشرة صفحات ظهرت فجأة لظباط شرطه وجيش تطالب بالسماح لهم باطلاق اللحيه مش عارف ايه الاهتمام الكبير والمفاجأ للحيه ؟ فى بلد الشرطه فيها اقذر من فيها وافسد من فيها لا وايه الى فيها الى هما افسدوا حياة المصريين وسرقوا المصريين وعذبوا المصريين ولفقوا قضايا للمصريين وعملوا كماين بهدلوا فيها المصريين وقتلوا المصريين بيطالبوا باطلاق اللحيه !!حلوة دى ملعوبه بجد. لا ودة كل همهم اللحيه  من الواضح ان اللحيه كل مشاكلهم ومعندهمش مشاكل ماديه رايقه يعنى معاهم والحمد لله ولا اخلاقيه مافيش مشاكل يعنى بيقابلوها فى الجهاز ان كان فى تعاملاتهم مع زمايلهم الوحشيين او رؤسائهم وواضح انهم زى السمن على العسل مع بعض المهم اللحيه  ولا فى مشاكل مهنيه  يعنى مترقيين ومعلقيين ومتسلقيين ويعرفوا يظبطوا امورهم  بس المهم اللحيه.
مشكلتهم الوحيدة اللحيه . !!!!!! 
الصفحه دى عجبتنى جدا ( انا ضابط شرطه وملتحى ) عجبنى فى التعريف انهم بيميزوا نفسهم عن باقى افراد الشرطه ومش عايزين يتركوا العمل حبا للوطن اولا وعشان اكل العيش ثانيا وعشان لا يتركوا الشرطه للظباط الى مش عايزين يلتحوا الفاسدين المخربين الى بيضربوا الشعب وبيعذبوة وبيقتلوة وبيسرقوة وبيسفتشوة وبيغتصبوة . يعنى من الاخر كدة الناس دى عايزة تقسم الشرطه نصفين وتنأى بنفسها بعيدا عن السمعه السيئه للشرطه وبتحاول تعمل عمليه تطهير فعلا للشرطه بتركيب دقن !!ويكون المظهر الجديد للشرطه  نصف ملتحى اتطهر خلاص وبقى زى الفل  ودول حيكونوا الشرفاء  ويخلعوا من مشاكل الشرطه واى حد يعاتبهم على افعال الشرطه سابقا وحاضرا حيقولوا بص احنا ملتحيين بدقن  مش احنا والله احنا نعرف ربنا وبنخاف ربنا دلوقتى واتطهرنا والنصف الاخر غير ملتحى ودول الوحشين الى لازم الشعب يتكلم معاهم  .!! هى ايه حكايه التقسيم ؟وهل بعد مايركبوا دقن يبقى كدة انتهى الموضوع ومافيش مطالبه بتطهير الشرطه ومافيش قصاص من قتله المصريين ؟ وبكدة يكون تم القضاء نهائيا على فكرة التطهير . دة يمكن بعد كدة هما الى يطالبوا بتطهير الشعب  اة والله ماهو احنا هبل. ويعملوا حركه الامر بالمعروف والنهى عن المنكر رسميا ..!!!